پنجاب میں گندم کی ذخیرہ اندوزی روکنے کیلئے سروے کرانے کا فیصلہ

 لاہور: پنجاب حکومت نے مڈل مین مافیا کی جانب سے کسانوں سے خریدی گئی گندم کی ذخیرہ اندوزی روکنے کیلئے محکمہ زراعت کے تعاون سے دیہی علاقوں میں سروے کروانے کا فیصلہ کیا ہے۔

45 لاکھ ٹن گندم خریداری کے بڑے ہدف کے تعاقب میں برسر پیکار پنجاب حکومت کے اہم حلقوں کو اس امر پر تشویش لاحق ہے کہ پنجاب میں زیر کاشت گندم کے مجموعی رقبے میں سے 40 فیصد کٹائی مکمل ہو چکی ہے جبکہ محکمہ خوراک کسانوں میں 24 لاکھ ٹن سے زائد باردانہ تقسیم کر چکا ہے تاہم ابھی تک محکمہ کو صرف 8 لاکھ ٹن گندم موصول ہوئی ہے جو کہ کٹائی کے مقابلے نہایت کم ہے۔

اس حوالے سے حکومت کو یہ مصدقہ اطلاعات بھی موصول ہوئی ہیں کہ اوپن مارکیٹ میں قیمت بڑھنے کی امید پر بڑے کسانوں نے گندم کی فروخت کو موخر کردیا ہے جبکہ غلہ منڈیوں کے آڑھتیوں سمیت اسٹاکسٹوں اور ٹریڈرز نے کسانوں سے گندم خرید کر منڈیوں یا گوداموں میں لے جانے کی بجائے کسانوں یا دیہات میں ہی دیگر لوگوں کے گھروں میں ذخیرہ کرنا شروع کردی ہے۔

اس صورتحال کی حقیقت جاننے اور نئی خریداری حکمت عملی طے کرنے کیلئے سینئر وزیر عبدالعلیم خان نے دیہات میں فیلڈ سروے کروانے کا فیصلہ کیا ہے تا کہ معلوم کیا جا سکے کہ کھیت سے گندم کہاں جا رہی ہے اور آیا کسان اسے ہولڈ کر رہا ہے یا زخیرہ اندوز مافیا گندم سٹوریج کیلئے دیہاتی مقامات کو استعمال کر رہا ہے۔

زرائع کے مطابق اس سروے کے لئے محکمہ زراعت شعبہ توسیع کی خدمات حاصل کرنے پر غور کیا جارہا ہے کیونکہ شعبہ توسیع کے پاس فیلڈ اسٹاف ہزاروں کی تعداد میں ہے اور ہر گاؤں میں اس کے نمائندوں کی کسانوں تک رسائی اور شناسائی ہے۔

The post پنجاب میں گندم کی ذخیرہ اندوزی روکنے کیلئے سروے کرانے کا فیصلہ appeared first on ایکسپریس اردو.

from ایکسپریس اردو » پاکستان https://ift.tt/3eYkNje

کورونا وائرس؛ وزیراعظم گورنرعمران اسماعیل کے لیے دعا گو

وزیراعظم عمران خان نے کہا کہ وہ گورنرعمران اسماعیل کی کورونا سے جلد صحت یابی کیلئے دعاگوہیں۔

وزیراعظم عمران خان کا کہنا ہے کہ گورنرعمران اسماعیل کی کورونا سے جلد صحت یابی کیلئے دعاگوہوں، اللہ تعالی عمران اسماعیل کو کورونا سے جنگ کی ہمت عطا فرمائے۔ آمین۔

واضح رہے کہ گورنرسندھ عمران اسماعیل کورونا وائرس کا شکارہوگئے تھے جس کی تصدیق انہوں نے خود ٹوئٹر اکاؤنٹ پر کی تھی۔ گزشتہ روز بخارمحسوس ہونے پرٹیسٹ کروایا گیا تھا۔

The post کورونا وائرس؛ وزیراعظم گورنرعمران اسماعیل کے لیے دعا گو appeared first on ایکسپریس اردو.

from ایکسپریس اردو » پاکستان https://ift.tt/2SfVQpF

حکومت کا کابینہ کی منظوری کے بغیر کی گئی تقرریوں پر نظرثانی کا فیصلہ

 اسلام آباد: وفاقی حکومت نے کابینہ کی منظوری کے بغیر کی گئی تقرریوں پر نظرثانی کا فیصلہ کیا ہے۔

ایکسپریس نیوز کے مطابق وفاقی حکومت نے کابینہ کی منظوری کے بغیر کی گئی تقرریوں پر نظرثانی کا فیصلہ کیا ہے، اس سلسلے میں وزیراعظم کے سیکرٹری نے تمام وزارتوں اور ڈویژنز کو مراسلہ جاری کردیا ہے جس میں کابینہ کی منظوری کے بغیر ہونے والی تقرریوں کی 30 اپریل تک تفصیلات طلب کی گئی ہیں۔ سیکرٹری کابینہ 5 مئی کو ان تقرریوں پر وفاقی کابینہ کو بریفنگ دیں گے۔

مراسلے میں کہا گیا ہے کہ سپریم کورٹ کے فیصلے کے مطابق وفاقی حکومت کا فیصلہ وفاقی کابینہ کا فیصلہ تصور ہوتا ہے، کابینہ کی منظوری کے بغیر ہونے والی تقرریوں کی تفصیلات بھجوائی جائیں۔ اس کے علاوہ وفاقی وزیر اور سیکرٹری کی جانب سے کی گئی تقرریوں کی تفصیلات بھی پیش کی جائیں۔

The post حکومت کا کابینہ کی منظوری کے بغیر کی گئی تقرریوں پر نظرثانی کا فیصلہ appeared first on ایکسپریس اردو.

from ایکسپریس اردو » پاکستان https://ift.tt/3aPzt0Y

ڈھول بجاکرسحری کے لیے جگانے کی دم روایت دم توڑنے لگی

 لاہور: رمضان المبارک میں شہروں کے اندر ڈھول بجاکرلوگوں کو سحری کے لئے جگانے کی روایت اب دم توڑتی جارہی ہے تاہم لاہورکے دیہی علاقوں سمیت پنجاب کے کئی قصبوں اوردیہات میں آج بھی ڈھولچی ڈھول بجاکر لوگوں کو سحری کے لیے بیدارکرتے ہیں۔

ڈھول بجا کر لوگوں کو سحری کے لیے بیدار کرنیوالے زیادہ تر افرادایسے ہیں جو شادی بیاہ، میلوں اورخوشی کے موقعوں پرڈھول بجاتے ہیں۔ شہروں میں یہ روایت اب ختم ہوچکی ہے اور صدیوں پرانی روایت کے حامل ایسے ڈھولچیوں کی تعداد میں واضح کمی دیکھی گئی ہے۔ اب گلیوں اور محلوں میں ڈھول کی تھاپ کے ساتھ ’’اٹھ جاؤ لوگو، سحری کھا کر روزہ رکھ لو‘‘ کی صدا کم ہی سننے میں ملتی ہے۔ تاہم دیہی علاقوں میں یہ رسم اب بھی موجود ہے۔

ایسے ڈھولچیوں میں واہگہ کا رہائشی بابا فقیرحسین بھی شامل ہے ، وہ گزشتہ بیس برسوں سے رمضان المبارک کے مہینے میں اپنے ڈھول پر لوگوں کو اٹھانے کا کام کررہا ہے۔ بابا فقیر حسین نے بتایا کہ وہ رات کوایک بجے اٹھتے ہیں، ان کا بیٹا ساتھ ہوتا ہے پھر وہ پورے گاؤں کا چکر لگاتے ہیں، دوسے ڈھائی گھنٹے میں ان کا کام مکمل ہوجاتا ہے، یہ کام وہ ایک نیکی سمجھ کر کرتے ہیں۔ خالی اور ویران گلیوں میں کئی کلومیٹر وہ اپنے ڈھول کو بجاتے ہوئے لوگوں کی توجہ روزہ رکھنے کی جانب مبذول کراتے ہیں۔

بابا فقیرحسین نے یہ بھی بتایا کہ کہ وہ کسی معاوضے کی خاطر یہ کام نہیں کرتے، ہاں اگر کوئی خود اپنی مرضی سے کچھ دینا چاہے تو لیتا ہے لیکن کسی سے مطالبہ نہیں کرتا۔ عام طور پر روزوں کے آخری ایام میں لوگ ان کی خدمت کرتے ہیں، کوئی سو روپے دیتا ہے تو کوئی پانچ سو اور ایک ہزار دے دیتا ہے،اس طرح وہ اپنوں کے بچوں کے لیے عید کے کپڑے اورجوتے خریدلیتے ہیں۔

دوسری طرف بعض لوگ اسلام میں ڈھول یا میوزک بجانے کو ممنوع بھی قرار دیتے ہیں اور پھر رمضان جیسے مبارک مہینے میں تو بقول ان کے اس کی کسی بھی صورت میں اجازت نہیں ہے۔ مذہبہ اسکالرعلامہ ضیا الحق نقشبندی کہتے ہیں اسلام کسی بھی صورت میں ڈھول بجانے کی اجازت نہیں دیتا۔ انہوں نے کہا کہ رمضان میں 3 بجے تو تہجد کا وقت ہوتا ہے لوگ عبادت میں مشغول ہوتے ہیں اور ایسے وقت میں ڈھول کی آواز سن کر عبادت میں خلل پڑسکتا ہے۔انہوں نے بتایا کہ سحری کے لئے لوگوں کو جگانا ثواب کا کام ہے لیکن ضروری نہیں ڈھول ہی بجائے جائے اور بھی تو کئی طریقے ہوسکتی ہیں۔

The post ڈھول بجاکرسحری کے لیے جگانے کی دم روایت دم توڑنے لگی appeared first on ایکسپریس اردو.

from ایکسپریس اردو » پاکستان https://ift.tt/3cZJ0nD

62،000 پاکستانی بیرون ملک سے وطن واپسی کے منتظر

 اسلام آباد: بیرونی ممالک میں واپسی کے منتظررجسٹرڈ پاکستانیوں کی تعداد 62،709 ہے۔

ایکسپریس نیوزکے مطابق وزیرخارجہ مخدوم شاہ محمود قریشی نے وزارت خارجہ میں قائم “ایمرجنسی کرایسزمینجمنٹ یونٹ کا ہنگامی دورہ کیا۔ ڈائریکٹرجنرل کرایسزمینجمنٹ یونٹ، سلمان اطہرنے وزیرخارجہ کا خیرمقدم کیا۔

وزیر خارجہ نے کرایسز مینجمنٹ یونٹ میں ڈیوٹی پرموجود افسران اور اہلکاروں سے سیل کی کارکردگی جانچنے کیلئے مختلف سوالات کیے۔ وزیر خارجہ نے بیرون ممالک، پاکستانیوں کی کرائسز مینجمنٹ یونٹ میں موصول ہونے والی کالز، شکایات اور ان کے ازالے کیلئے کیے گئے اقدامات کا بھی جائزہ لیا۔

ڈی جی ایمرجنسی کرائسز مینجمنٹ یونٹ سلمان اطہر نے کورونا وبا کے دوران، مختلف ممالک میں واپسی کے منتظر پاکستانیوں کی وطن واپسی کے حوالے سے وزیر خارجہ کو مفصل بریفنگ دی ہے۔

وزیر خارجہ نے ایمرجنسی کرایسز مینجمنٹ یونٹ کی بہترین کارکردگی کو سراہتے ہوئے ڈی جی سلمان اطہراوران کی ساری ٹیم کو مبارکباد دی۔

ڈی جی کرائسزمینجمنٹ یونٹ نے بتایا کہ اب تک 11529 پاکستانیوں کوبیرونی ممالک سے وطن واپس لایا جا چکا ہے، بیرونی ممالک میں واپسی کے منتظررجسٹرڈ پاکستانیوں کی تعداد 62،709 ہے۔

وزیر خارجہ نے کہا کہ بیرون ملک مقیم پاکستانیوں کی مشکلات اور تکالیف کا ہمیں مکمل ادراک ہے، حکومت بیرونی ممالک میں واپسی کے منتظر پاکستانیوں کی مرحلہ وار، جلد وطن واپسی کیلئے تمام ممکنہ وسائل بروئے کارلارہی ہے۔

The post 62،000 پاکستانی بیرون ملک سے وطن واپسی کے منتظر appeared first on ایکسپریس اردو.

from ایکسپریس اردو » پاکستان https://ift.tt/2SbKdjw

کوروناوبا؛ ملک میں 14079 مصدقہ مریض، جاں بحق افراد کی تعداد 300 سے بڑھ گئی

 اسلام آباد /  کراچی: ملک بھر میں کورونا وائرس کے ہاتھوں لقمہ اجل بننے والوں کی تعداد 301 ہوگئی ہے۔ 

نیشنل کمانڈ اینڈ کنٹرول سینٹر کی جانب سے جاری کردہ اعداد و شمار کے مطابق ملک بھر میں لوگوں میں کورونا کے وار جاری ہیں اور 24 گھنٹوں کے دوران مزید 751 افراد میں اس وائرس کی تشخیص ہوئی ہے۔ جس کے بعد کورونا کیسز کی تعداد 14 ہزار 79 ہو گئی ہے تاہم اس میں سے 3233 افراد صحت یاب ہوگئے ہیں۔

مریض 14 ہزار سے بھی بڑھ گئے

سرکاری اعداد و شمار کے مطابق کورونا کی تشخیص کےلیے اب تک ایک لاکھ 57 ہزار 223 ٹیسٹ کیے گئے ہیں، گزشتہ 24 گھنٹوں کے دوران کورونا کے شبے میں 6417 افراد کے ٹیسٹ کیے گئے جن میں سے 751 میں اس کی تشخیص ہوئی ہے اور اب ملک بھر میں اس وائرس کے مصدہق مریضوں کی تعداد 14 ہزار 79 ہوگئی ہے۔

پنجاب میں سب سے زیادہ مریض

نیشنل کمانڈ اینڈ کنٹرول سینٹر کے اعداد و شمار کے مطابق ملک بھر میں سب سے زیادہ مریض پنجاب میں ہیں، جہاں کورونا کے مصدقہ مریضوں کی تعداد 5640 ہے، ہے، اس کے علاوہ سندھ میں 4956، خیبرپختونخوا 1984، بلوچستان میں 781، اسلام آباد میں 261، گلگت بلتستان میں 320  جب کہ آزاد کشمیر میں کورونا کے مریضوں کی تعداد 65 ہوگئی ہے۔

301 افراد جاں بحق

اب تک ملک بھر میں کورونا وائرس کے شکار 301 مریض جاں بحق ہوچکے ہیں۔ اس کے علاوہ ملک بھرمیں کورونا کے 111 مریضوں کی حالت تشویش ناک ہے۔ خیبرپختونخوا میں کورونا سےانتقال کرنے والوں کی تعداد104 ہوگئی ہے۔ سندھ میں 85، پنجاب میں 91، بلوچستان میں14 اورگلگت بلتستان میں کورونا سےانتقال کرنے والوں کی تعداد 3 ہے۔

رمضان المبارک کے لیے احتیاطی تدابیر اور اصول

حکومت نے رمضان المبارک کے دوران کورونا سے بچنے کے لیے عبادات سمیت مختلف شعبوں کے لیے احتیاطی تدابیر پر مشتمل رہنما اصول جاری کردیے ہیں۔ جس کے تحت مساجد میں 50 سال سے زیادہ عمر کے افراد اور بچوں کی اجازت نہیں ہوگی، رمضان المبارک کے دوران مساجد کا رخ کرنے والوں کے لیے گھر سے وضو کرکے آنا، باجماعت نماز اور تراویح کے لیے صفوں کے درمیان چھ فٹ کا فاصلہ رکھنا، سحر و افطار کے اجتماعات نہیں ہوں، قالین یا چٹائی اٹھا کر فرش کو باقاعدگی سے کلورینٹڈ پانی سے دھونا ہوگا۔ اعتکاف کے خواہش مند گھر پر ہی اعتکاف بیٹھیں گے۔

کورونا وائرس اور احتیاطی تدابیر:

کورونا وائرس کے خلاف یہ احتیاطی تدابیر اختیار کرنے سے اس وبا کے خلاف جنگ جیتنا آسان ہوسکتا ہے۔ صبح کا کچھ وقت دھوپ میں گزارنا چاہیے، کمروں کو بند کرکے نہ بیٹھیں بلکہ دروازہ کھڑکیاں کھول دیں اور ہلکی دھوپ کو کمروں میں آنے دیں۔ بند کمروں میں اے سی چلاکر بیٹھنے کے بجائے پنکھے کی ہوا میں بیٹھیں۔

سورج کی شعاعوں میں موجود یو وی شعاعیں وائرس کی بیرونی ساخت پر ابھرے ہوئے ہوئے پروٹین کو متاثر کرتی ہیں اور وائرس کو کمزور کردیتی ہیں۔ درجہ حرارت یا گرمی کے زیادہ ہونے سے وائرس پر کوئی اثر نہیں ہوتا لیکن یو وی شعاعوں کے زیادہ پڑنے سے وائرس کمزور ہوجاتا ہے۔

پانی گرم کرکے تھرماس میں رکھ لیں اور ہر ایک گھنٹے بعد آدھا کپ نیم گرم پانی نوش کریں۔ وائرس سب سے پہلے گلے میں انفیکشن کرتا ہے اور وہاں سے پھیپھڑوں تک پہنچ جاتا ہے، گرم پانی کے استعمال سے وائرس گلے سے معدے میں چلا جاتا ہے، جہاں وائرس ناکارہ ہوجاتا ہے۔

The post کوروناوبا؛ ملک میں 14079 مصدقہ مریض، جاں بحق افراد کی تعداد 300 سے بڑھ گئی appeared first on ایکسپریس اردو.

from ایکسپریس اردو » پاکستان https://ift.tt/2Ynp5Ll

طور خم اور چمن بارڈر6 دن کیلیے مشروط کھولنے کا مطالبہ

پشاور:  افغانستان کے ساتھ تجارت کرنے والے کاروباریوں نے لاک ڈائون کے دوران افعانستان کے لیے پھل سبزیوں سمیت دیگر اشیائے خوردونوش کی برآمدات کی اجازت دینے کا مطالبہ کردیا۔

پاک افغان جوائنٹ چیمبر کے سابق ڈائریکٹر ضیاالحق سرحدی نے بتایاکہ کورونا لاک ڈائون سے متاثرہ ملک افغانستان میں سبزی پھلوں ودیگر اشیائے خوردونوش کمی واقع ہوئی حکومت اگر اپنی برآمدی سرگرمیاں بڑھانا چاہتی ہے تو وہ جزبہ خیرسگالی کے تحت پھل سبزیوں سمیت دیگر اشیائے خوردونوش کے لیے ہفتے کے 3 دن کے بجائے6دن کے لیے پشاورطورخم اور کوئٹہ چمن کی سرحدوں کومشروط انداز میں کھول دے۔

The post طور خم اور چمن بارڈر6 دن کیلیے مشروط کھولنے کا مطالبہ appeared first on ایکسپریس اردو.

from ایکسپریس اردو » پاکستان https://ift.tt/2Sha2yS

وفاق اور صوبوں کے درمیان عدم اتفاق، نویں این ایف سی ایوارڈ کی آئینی مدت ختم

 اسلام آباد: وفاق اور صوبوں کے درمیان مالی وسائل کی تقسیم پر  عدم اتفاق کے باعث نویں این ایف سی ایوارڈ کی آئینی مدت ختم ہو گئی ہے،وزارت خزانہ دسویں این ایف سی ایوارڈ کی منظوری کیلئے صدر مملکت کو نئی سمری ارسال کرے گی۔

سرکاری ذرائع کے مطابق نئے ایوارڈ میں قواعد کی تبدیلی بھی متوقع ہے، 1973ء کے بعد یہ پانچواں کمیشن تھا جو نئے ایوارڈ پر عدم اتفاق کے باعث ختم ہو گیا،تاحال چار کمیشن نئے ایوارڈز جاری کر چکے ہیں دسویں این ایف سی ایوارڈ کو رواں ہفتے جاری ہونا تھا، جسے دراصل وفاق اور صوبوں کے درمیان مالی وسائل کی تقسیم کیلئے آٹھویں این ایف سی ایوارڈ پر اتفاق رائے پیدا کرنا تھا،صوبوں پر یہ دباؤ ہے کہ وہ اپنے ایک مخصوص مالی حصے سے دستبردار ہو جائیں یا اضافی اخراجات کی ذمہ داری لیں۔

موجودہ حکومت سمیت گزشتہ تینوں حکومتوں کی غلط پالیسیوں کے نتیجے میں پچھلے دس برسوں میں نہ صرف اخراجات میں اضافہ ہوا جس سے قرض کا بوجھ بڑھا بلکہ ٹیکس ریونیو بھی جمود کا شکار رہا،تعلیم اور صحت سمیت صوبوں کو متعدد شعبوں کی ذمہ داری تفویض کرنے کے باوجود ہر آنے والی حکومت سیاسی وجوہات کی بنا پر تعلیم اور صحت کے لیے بھی فنڈ جاری کرتی رہی،وفاقی حکومت ان امور کو بھی متوازی طور پر چلاتی رہی جن کی آئینی ذمہ داری صوبوں کی تھی،نواں این ایف سی ایوارڈ آٹھویں ایوارڈ کو حتمی شکل دینے کیلئے اپریل 2015ء میں تشکیل دیا گیا،مگر صوبوں کی جانب سے اپنے آئینی حصے سے دستبرداری سے انکار کے باعث یہ ایوارڈ تمام متعلقہ فریقوں کے مابین اتفاق رائے پید ا نہ کر سکا۔

The post وفاق اور صوبوں کے درمیان عدم اتفاق، نویں این ایف سی ایوارڈ کی آئینی مدت ختم appeared first on ایکسپریس اردو.

from ایکسپریس اردو » پاکستان https://ift.tt/2yQZEXu

پنجاب میں نیا پاکستان ہاؤسنگ اسکیم ناکام

 لاہور:  پنجاب میں وزیراعظم کے نیا پاکستان ہاؤسنگ منصوبے کو بڑا دھچکا۔

سال پہلے وزیراعظم سے منصوبے کا سنگ بنیاد رکھوا دیا گیا مگر ابھی تک تعمیرا تی کام شروع نہ ہوسکا۔ پنجاب میں 25 لاکھ گھر بنا نے کا منصوبہ لٹک گیا ، صورتحال یہ ہے کہ ابھی تک منصوبے کے پی سی ون کی منظوری نہیں دی گئی۔اب کرونا بحران کے باعث اس منصوبے کی تعمیر شروع ہونے کے امکانات کم ہوگئے ہیں۔

ڈونرز کے ایک تعمیراتی گروپ نے رینالہ خورد میں پولیس کیلئے 20 گھر بنانے شروع کئے ، اب وہ بھی سٹرکچر ادھورا چھوڑ کر چلے گئے ہیں، محکمہ پنجاب ہاؤسنگ ان کے ساتھ معاملات طے نہیں کر سکا۔

 

The post پنجاب میں نیا پاکستان ہاؤسنگ اسکیم ناکام appeared first on ایکسپریس اردو.

from ایکسپریس اردو » پاکستان https://ift.tt/3bNUjPq

ترسیل میں رکاوٹیں، کراچی میں گندم اور آٹے کی قلت، قیمتیں بڑھنے کا خدشہ

کراچی: محکمہ خوراک سندھ کی کراچی کے لیے اندرون سندھ سے خریدی گئی گندم کی ترسیل میں رکاوٹوں کے باعث کراچی میں گندم اور آٹے کی دستیابی اور قیمتوں کا بحران اٹھنے کا خدشہ پیدا ہوگیا ہے۔

فلور ملز مالکان نے بتایا کہ سندھ کی فلورملوں کو گندم کی قلت کا سامناہے جس کی وجہ  سے پیرکوفی 100کلوگرام گندم کی قیمت 3500 روپے سے بڑھ کر 3800روپے ہوگئی ہے۔ پاکستان فلور ملز ایسوسی ایشن سندھ ریجن کے چیئرمین خالد مسعود نے ایکسپریس کو بتایاکہ سیکریٹری خوراک سندھ کے ساتھ اس ضمن میں اجلاس کے دو دور ہوچکے ہیں جس میں انھوں نے محکمہ خوراک کے متعلقہ حکام کو کراچی کے لیے گندم کی ترسیل میں کسی قسم کی رکاوٹ نہ ڈالنے کے واضح احکامات جاری کیے لیکن ان احکامات کے باوجود محکمہ خوراک کا نچلا عملہ گندم کی ترسیل میں بدستور رکاوٹیں ڈال رہا ہے ۔

خالد مسعود نے بتایاکہ گندم کی ترسیل میں رکاوٹ سے آئندہ2دن میں 20 فلورملیں بند ہوجائیں گی اور آئندہ72گھنٹوں میں گندم کی ترسیل معقول انتظام نہ کیاگیا توکراچی کی آپریشنل 73 فلورملیں اپنی پیداواری سرگرمیاں بند کرنے پرمجبور ہونگی جس کی تمام ذمہ داری محکمہ خوراک سندھ پر عائد ہوگی۔

 

The post ترسیل میں رکاوٹیں، کراچی میں گندم اور آٹے کی قلت، قیمتیں بڑھنے کا خدشہ appeared first on ایکسپریس اردو.

from ایکسپریس اردو » پاکستان https://ift.tt/2y4QoiC

اسٹیٹ بینک نے ملازمتوں میں کٹوتی نہ کرنے والوں کیلئے رعایتی پیکج تیار کرلیا

 اسلام آباد: اسٹیٹ بینک نے ملازمتوں میں کٹوتی نہ کرنے والی  صنعتوں  کے لیے پیکج تیار کرلیا جس کے تحت فائلرز صرف 3 فیصد کی شرح سود قرض لے سکیں گے جبکہ تنخواہوں کی مد میں ہر شعبے کو 50 کروڑ روپے تک رعایتی قرضے فراہم کیے جائیں گے۔

ایکسپریس کو دستیاب دستاویز کے مطابق مسودے  میں تنخواہوں کی مد میں ہر شعبے کو 50 کروڑ روپے تک رعایتی قرضے  دینے کی تجویز شامل ہے۔ فائلرز کو 3 اور نان فائلر کو 5 فی صد شرح سود پہ قرضے ملیں گا۔ اسکیم کے تحت ہر شعبہ کو تنخواہوں کی مد میں 50 کروڑ روپے تک رعایتی قرضے مل سکیں گے جبکہ چھوٹے کاروباروں کیلئےگارنٹی کےبغیر50لاکھ تک قرضہ مل سکے گا۔

تفصیلات کے مطابق تمام  شعبوں کو قرض کی واپسی میں 6 ماہ کی مہلت حاصل ہو گی اور سہہ ماہی بنیادوں پر قرض واپسی کی اقساط ادا کرنا ہوں گی سکیم کے تحت دفاتر، سکول، کارخانے، بینک سمیت ہر شعبہ اسکیم سے فائدہ اٹھا سکےگا۔ اقتصادی رابطہ کمیٹی اسٹیٹ بینک کی اسکیم کی منظوری دے گی جس کے بعد اسٹیٹ بینک پیکج پر فوری عملدرآمد شروع کر دے گا۔  سکیم سے قرض حاصل کرنے کی آخری تاریخ 30 جون 2020 ہے۔

The post اسٹیٹ بینک نے ملازمتوں میں کٹوتی نہ کرنے والوں کیلئے رعایتی پیکج تیار کرلیا appeared first on ایکسپریس اردو.

from ایکسپریس اردو » پاکستان https://ift.tt/2yKo59h

کورونا وائرس کے باعث سمندر پار 22 ہزارسے زائد پاکستانی بے روزگار

 اسلام آباد: کورونا وائرس وبا کے پھیلاؤ سے پیدا ہونے والے عالمی معاشی بحران کے باعث 22 ہزارسے زائد سمندر پار پاکستانی بے روزگار ہوگئے ہیں۔

ایکسپریس نیوز کو دستیاب دستاویزات کے مطابق متحدہ عرب امارات میں ساڑھے 17 ہزارمزدور پیشہ  پاکستانی ملازمتوں سے فارغ ہوگئے جب کہ قطر سے 691  اور اومان سے 600 پاکستانی ملازمتوں سے فارغ ہوئے۔اس کے علاوہ سعودی کمپنیوں نے 1 ہزار 245 پاکستانیوں کو ملازمت سے برخاست کیا۔

واضح رہے کہ کورونا وائرس کی وبا کے باعث عالمی بینک نے بین الاقوامی سطح پر ترسیلات زر میں 20فصد کمی کا خدشہ ظاہر کیا تھا اور جنوبی ایشیائی ممالک میں شرح 22فی صد تک ہونے کا اندازہ ظاہر کیا تھا۔ کورونا کی وبا کے باعث دنیا بھر میں لاک ڈاون ، صنعتی پیداوار اور منڈیاں  بند ہونے کی وجہ سے روزگار کے مواقع کو شدید خطرات لاحق ہیں۔

یہ بھی پڑھیے: سعودی کمپنیاں آئندہ تین ماہ تک پاکستانیوں کو برطرف نہیں کریں گی

عالمی بینک پہلے ہی اپنی رپورٹ میں خبردار کرچکا ہے کہ تیل کی قیمتوں میں کمی کے باعث خلیجی ممالک سے ترسیلات میں واضح کمی واقع ہوگی۔ جبکہ لاک ڈاون کی وجہ سے امریکا، برطانیہ اور یورپی ممالک سے ترسیلات زر میں کمی کے خدشات کا اظہار کیا تھا۔عالمی بینک نے جنوبی ایشیا میں ترسیلات زر 22 فیصد کمی سے 109ارب ڈالر رہنے کا امکان ظاہر کیا تھا۔

The post کورونا وائرس کے باعث سمندر پار 22 ہزارسے زائد پاکستانی بے روزگار appeared first on ایکسپریس اردو.

from ایکسپریس اردو » پاکستان https://ift.tt/3aMyJJD

گورنر سندھ عمران اسماعیل میں کورونا وائرس کی تصدیق

کراچی: گورنر سندھ عمران اسماعیل کا  کورونا وائرس کا ٹیسٹ مثبت آگیا ہے۔ 

ایکسپریس نیوز کے مطابق گورنر سندھ عمران اسماعیل میں کورونا وائرس کی تصدیق ہوگئی ہے۔ ذرایع کے مطابق گزشتہ روز بخار محسوس ہونے پر ٹیسٹ کروایا گیا تھا۔ گورنر نے گزشتہ روز اپنے اہل خانہ کے ساتھ افطار کی تھا۔

I have just been tested Covid 19 positive, Allah Kareem inshallah will fight it out. @ImranKhanPTI thought us to fight out the most difficult in life and I believe this is nothing against what we r prepared for. May Allah give strength to fight this Pandemic inshallah.

— Imran Ismail (@ImranIsmailPTI) April 27, 2020

گورنر سندھ نے اپنے ٹوئٹر اکاؤنٹ پر بھی کورونا وائرس سے متاثر ہونے کی تصدیق کردی ہے۔ ٹوئٹ میں ان کا کہنا تھا کہ کورونا وائرس کا ٹیسٹ مثبت آگیا ہے۔ اللہ کریم کی مدد سے اس سے مقابلہ کروں گا۔ عمران خان نے مشکل وقت سے لڑنا سکھایا ہے، ہمیں جن مشکلات سے لڑنا سکھایا گیا ہے یہ بیماری اس کے آگے کچھ نہیں۔ اللہ تعالی مجھے اس وبا سے لڑنے کی توفیق عطا فرمائے۔

The post گورنر سندھ عمران اسماعیل میں کورونا وائرس کی تصدیق appeared first on ایکسپریس اردو.

from ایکسپریس اردو » پاکستان https://ift.tt/2KFOcko

کورونا وائرس: وزیر اعلی نے ’رائز‘ پنجاب منصوبے کی منظوری دے دی

لاہور: وزیراعلیٰ پنجاب نے کورونا وباء کے دوران معاشی سرگرمیاں قائم رکھنے کے لیے “رائز پنجاب” کے نام سے ابتدائی فریم و رک کی منظوری دے دی۔

ایکسپریس نیوز کے مطابق وزیر اعلی پنجاب سردارعثمان بزدار نے اعلیٰ سطحی اجلاس میں ’رائز‘ پنجاب کےنام سےابتدائی فریم ورک کی منظوری دے دی۔ اس موقعے پر ان کا کہنا تھا کہ  صوبے میں ترقیاتی منصوبوں، بزنس کے فروغ اور سرمایہ کاری بڑھانے کیلئے نئی سوچ کے ساتھ نئے اقدامات کیے جائیں گے۔

وزیراعلیٰ کا کہنا تھا کہ پنجاب پہلا صوبہ ہے جس نے کورونا وباء کے پیش نظر بدلتی صورتحال کے تناظر میں رائز پنجاب کا پلان مرتب کیا ہے۔ صوبے میں ترقیاتی منصوبوں، بزنس کے فروغ اور سرمایہ کاری بڑھانے کیلئے نئی سوچ کے ساتھ نئے اقدامات کیے جائیں گے۔  رائز پنجاب کے تحت صحت، تعلیم اور سماجی تحفظ کیلئے بھی منفرد لائحہ عمل مرتب کیا جا رہا ہے۔

انہوں نے ہدایت کی کہ سوشل پروٹیکشن فنڈ کے قیام کی تجویز کا جائزہ لے کر جلد رپورٹ پیش کی جائے، پبلک پرائیویٹ پارٹنر شپ کے تحت نجی سرمایہ کاروں کی حوصلہ افزائی کی جائے گی۔

وزیراعلیٰ عثمان بزدار کی ہدایت پر کورونا وباء سے نمٹنے سے متعلق قائم کابینہ کمیٹی کا ویڈیو لنک اجلاس بھی ہوا جس میں مساجدکیلئے جاری 20نکاتی اعلامیہ پر عملدرآمد سمیت  کورونا وباء کے حوالے سے احتیاطی تدابیر اور حفاظتی اقدامات کا تفصیلی جائزہ لیاگیا۔

The post کورونا وائرس: وزیر اعلی نے ’رائز‘ پنجاب منصوبے کی منظوری دے دی appeared first on ایکسپریس اردو.

from ایکسپریس اردو » پاکستان https://ift.tt/2WgYe0P

اٹھارہویں ترمیم کے ساتھ چھیڑ چھاڑ برداشت نہیں کریں گے، بلاول

کراچی /  اسلام آباد: چیئرمین پیپلز پارٹی بلاول بھٹو زرداری نے کہا ہے کہ اٹھارہویں ترمیم پر کسی صورت سمجھوتا نہیں کریں گے اور اس کے ساتھ چھیڑ چھاڑ برداشت نہیں کی جائے گی۔

ایکسپریس نیوز کے مطابق چیئرمین بلاول بھٹو زرداری اور مولانا فضل الرحمان کے مابین ٹیلیفونک رابطہ ہوا ہے جس میں 18ویں آئینی ترمیم کے تحفظ کے حوالے سے اتفاق کیا گیا۔ اس رابطے میں بلاول بھٹو زراداری کا کہنا تھا کہ ہم 18ویں آئینی ترمیم کے خاتمے کے حوالے سے کسی بھی کوشش کو برداشت نہیں کریں گے۔

ان کا کہنا تھا کہ ہم نے 18ویں آئینی ترمیم کے ذریعے دستور کو اس کی اصل شکل میں بحال کیا۔ ملک کورونا وائرس کی وجہ سے سنگین حالات سے گزررہا ہے، وفاق آئین سے چھیڑچھاڑ کے بجائے صوبوں کی مدد کرے۔ غیر ملکی خبر رساں ادارے کو دیے گئے انٹرویو میں بھی چیئرمین پی پی پی نے ان تحفظات کا اظہار کیا اور اٹھارہویں ترمیم میں تبدیلی کی کسی ممکنہ کوشش کی شدید مخالفت کا عندیہ دیا۔ ایکسپریس نیوز کے مطابق چیئرمین پی پی اس حوالے سے اپوزیشن لیڈر شہباز شریف سے بھی رابطہ کرچکے ہیں جب کہ مسلم لیگ ن کے رہنما احسن اقبال کی جانب سے بھی 18 ویں ترمیم میں کسی ممکنہ تبدیلی کی مخالفت کا بیان سامنے آچکا ہے۔

دوسری جانب وزیر خارجہ شاہ محمود قریشی کا کہنا ہے کہ 18ویں ترمیم کی اہمیت سےانکارہےنہ ہی حکومت اسے ختم کرنےکاارادہ رکھتی ہے۔ صوبےاپنانظام وضع کریں صرف مرکزکی طرف نہ دیکھیں۔ دیکھناہےجس مقصدکیلیے18ویں ترمیم لائی گئی اس پرعمل ہواکہ نہیں۔ صوبوں کومرکزکےساتھ بیٹھ کرسارےعمل کاازسرنوجائزہ لیناہوگا۔

واضح رہے کہ وفاقی وزرا اسد عمر اور فواد چودھری کی جانب سے 18 ترمیم میں سقم اور اس کے مؤثر اطلاق کے حوالے سے بیانات سامنے آتے رہیں ہیں جب کہ گزشتہ دنوں وفاق کی جانب سے اس ترمیم میں تبدیلی کے حوالے سے اطلاعات بھی سامنے آئی ہیں تاہم حکومت کی جانب سے ایسی کسی قانونی مشاورت یا اقدام کی تصدیق نہیں کی گئی ہے۔

18 ویں ترمیم پیپلز پارٹی کے دور حکومت میں 8 اپریل 2010 کو منظور ہوئی تھی۔ اس ترمیم کے بعد صحت، تعلیم اور سیلز ٹٰیکس وغیرہ جیسے کئی اہم شعبوں کے اختیارات وفاق سے صوبوں کو منتقل کردیے گئے تھے۔

The post اٹھارہویں ترمیم کے ساتھ چھیڑ چھاڑ برداشت نہیں کریں گے، بلاول appeared first on ایکسپریس اردو.

from ایکسپریس اردو » پاکستان https://ift.tt/2yLxxsQ