پی ٹی آئی اور جی ڈی اے کے وفود کی ادارہ نور حق آمد

کراچی: پی ٹی آئی اور جی ڈی اے کے وفود نے ادارہ نور حق میں جماعت اسلامی  کے رہنماؤں سے ملاقات کی اور سینیٹ کے انتخابات میں جماعت اسلامی کی حمایت حاصل کرنے کیلیے درخواست کی ہے۔

پی ٹی آئی کے  دورکنی وفد جس میں سینیٹ میں امیدوار سیف اللہ ابڑو کے علاوہ فداحسین نیازی شامل تھے نے  ہفتے کوادارہ نورحق میں جماعت اسلامی کے رہنماؤں سے ملاقات کی اور 3مارچ کو ہونے والے سینیٹ انتخابات میں جماعت اسلامی کی جانب سے پی ٹی آئی کے امید وار کو ووٹ دینے کی درخواست کی۔

جماعت اسلامی نے وفد کو بتایا کہ مرکز سے مشاورت کے بعد حتمی فیصلہ کیا جائے گا،تفصیلات کے مطابق پی ٹی آئی کے رہنماؤں نے جماعت اسلامی کراچی کے امیر حافظ نعیم الرحمن،نائب امرا راجہ عارف سلطان،مسلم پرویز،سکریٹری کراچی منعم ظفر خان سے ملاقات کی اور سندھ اسمبلی میں جماعت اسلامی کے رکن کی حمایت حاصل کرنے کے لیے درخواست کی۔

ملاقات میں کراچی سمیت اندرون سندھ کے عوام کے مسائل بالخصوص شہر قائد کی ابتر صورتحال اور بلدیاتی انتخابات کے انعقاد سمیت باہمی دلچسپی امور اور سیاسی حالات پر تبادلہ خیال بھی کیا گیا۔

علاوہ ازیں گرینڈ ڈیموکریٹک الائنس (GDA)کے رہنما پیرپیر صدر الدین شاہ راشدی اور سردار رحیم نے بھی ادارہ نور حق میں امیر جماعت اسلامی کراچی حافظ نعیم الرحمن، نائب امیر مسلم پرویز سے ملاقات کی اور سینیٹ کے انتخابات میں جماعت اسلامی کی حمایت حاصل کرنے کی درخواست کی۔

ملاقات میں ملکی سیاسی صورتحال، کراچی و اندورن ِ سندھ کے حالات اور عوام کی حالت ِ زار پر گفتگو کی گئی،حافظ نعیم الرحمن نے وفد کو بتایا کہ مرکزی قیادت سے مشاورت کے بعد فیصلہ کیا جائے گا کہ سینیٹ انتخابات میں کس کی حمایت کی جائے۔

 

The post پی ٹی آئی اور جی ڈی اے کے وفود کی ادارہ نور حق آمد appeared first on ایکسپریس اردو.

from ایکسپریس اردو » پاکستان https://ift.tt/3syXG4S