کورونا وائرس؛ 250 سے زائد مشتبہ مریض معائنے کے لیے پمز پہنچ گئے

 اسلام آباد: کورونا وائرس کے 250 سے زائد مشتبہ مریض معائنے کے لیے اسلام آباد میں پمز اسپتال پہنچ گئے تاہم صرف 2 افراد میں ہی کورونا وائرس کی تصدیق ہوئی ہے۔

پاکستان میں جہاں کورونا وائرس سے متاثرہ افراد کی تعداد میں اضافہ ہونے لگا ہے وہیں اب اسپتالوں میں اس وائرس کے مشتبہ مریضوں کی آمد میں بھی بدستور اضافہ جاری ہے، شہری نزلہ زکام اور بخار لگتے ہی کرونا وائرس کے شبے میں اسپتالوں کا رخ کرنے لگے ہیں، پمز اسپتال میں اب تک 250 سے زائد مشتبہ مریضوں کو معائنہ کے لیے لایا گیاہے تاہم اب تک اسلام آباد میں سرکاری طور پر 2 افراد میں کورونا وائرس کی تصدیق کی گئی ہے۔

اسپتال ذرائع کا کہنا ہے کہ پمز اسپتال میں کوروناوائرس کے شبے میں اب تک اڑھاِئی سو سے زائد مریض معائنہ کیلئے آچکے ہیں ان میں سے 40 کے قریب افراد کے خون کے نمونے ٹیسٹ کیلئے این آئی ایچ کو بھجوادیے گئے تھے۔

اسپتال ذرائع کا کہنا ہے کہ مشتبہ مریضوں میں اب تک دو مریضوں کے خون نمونے میں کورونا وائرس کی تصدیق ہوچکی ہے، اسپتال ذرائع کے مطابق کوروناوائرس سے متاثرہ اسپتال میں پہلے سے موجود مریض کی حالت بہتر ہے اور خطرے سے باہر ہے، ان کا مزید کہنا تھا کہ مشتبہ مریض آئیسولیشن وارڈ میں داخل ہے، ان سے کسی کو ملنے کی اجازت نہیں۔

اسپتال ذرائع کا کہنا ہے کہ کورونا وائرس کے شبے میں آنے والے تمام مشتبہ مریضوں کے خون کے نمونے ٹیسٹ کیلئے نہیں بھجوائے جارہے بلکہ محض ایک ماہ کے دوران چین، ایران یا دیگر متاثرہ ممالک سے آئے افراد کے ٹیسٹ کئے جارہے ہیں جب کہ آئیسولیشن وارڈ میں صرف ان مریضوں کو داخل کیا جاتا ہے جن کے سیمپل لئے جاتے ہیں۔

The post کورونا وائرس؛ 250 سے زائد مشتبہ مریض معائنے کے لیے پمز پہنچ گئے appeared first on ایکسپریس اردو.

from ایکسپریس اردو » پاکستان https://ift.tt/2VzBfPN