راولپنڈی میں ایک اور بچہ مبینہ زیادتی کے بعد قتل، ملزم گرفتار

 راولپنڈی: گلزار قائد میں ایک اور بچے کو مبینہ زیادتی کے بعد قتل کردیا گیا۔ 
ایکسپریس نیوز کے مطابق راولپنڈی کے علاقے گلزار قائد کا رہائشی ثناء اللہ گزشتہ روز لاپتا ہوا تھا، تاہم  آج بجے کی لاش گلزار قائد ریلوے ٹریک کے قریب سے ملی ہے۔

پولیس حکام کا کہنا ہے کہ بچے کو مبینہ زیادتی کے بعد قتل کیا گیا ہے، بچہ غریب گھرانے سے تعلق رکھتا ہے، واقعے کی اطلاع ملتے ہی پولیس کی ٹیم نے جائے وقوعہ پر پہنچ کر لاش پوسٹ مارٹم کے لیے اسپتال منتقل کردی۔ پوسٹ مارٹم رپورٹ سے وجہ موت اور زیادتی کا تعین ہو سکے گا۔

دوسری جانب ائیرپورٹ پولیس نے دعویٰ کیا ہے کہ پولیس کی تحقیقاتی ٹیم نے فوری کاروائی کرتے ہوئے ملزم کاشف کو حراست میں لے لیا ہے،  بچے کے لاپتہ ہونے کی رپورٹ گزشتہ رات پولیس کو کی گئی تھی، جس پر پولیس نے سی سی ٹی وی فوٹیجز کی مدد سے ملزم کاشف کو شناخت کیا اور ٹریس کرکے حراست میں لے لیا۔

پولیس کے مطابق ابتدائی تحقیقات میں انکشاف ہوا ہے کہ ملزم نے خاندانی تنازعہ کی وجہ سے معصوم ثناءاللہ کو قتل کیا، ملزم نے اپنے ابتدائی بیان میں بچے کو اس کے گھر سے لے جانے اور قتل کرنے کا انکشاف کیا ہے، اور بتایا کہ بچے کی نعش ریلوے ٹریک کے قریب جھاڑیوں میں چھپائی ہے۔ واقعے کا مقدمہ مقتول ثناءاللہ کی والدہ کی مدعیت میں درج کردیا گیا ہے۔

 

The post راولپنڈی میں ایک اور بچہ مبینہ زیادتی کے بعد قتل، ملزم گرفتار appeared first on ایکسپریس اردو.

from ایکسپریس اردو » پاکستان https://ift.tt/3yzmTP1